კარიესი: როგორ ავიცილოთ თავიდან?

კარიესი: როგორ ავიცილოთ თავიდან?

პირის ღრუს ერთ-ერთი ყველაზე გავრცელებული დაავადება, რომელიც მილიონობით ადამიანს აწუხებს  კარიესია. ის წარმოიქმნება პირის ღრუში არსებული ბაქტერიების, შაქრისა და სხვა ნახშირწყლების ურთიერთქმედების შედეგად. ამ პროცესში გამოიყოფა მჟავა, რომელიც დროთა განმავლობაში აზიანებს კბილის მინანქარს და იწვევს კბილის ქსოვილის დაშლას. ბევრ ადამიანს უბრალოდ არ ესმის, რამდენად სერიოზული შეიძლება იყოს ეს პრობლემა და რა გართულებებს იწვევს მკურნალობის გადავადება. ამ სტატიაში განვიხილავთ, თუ რა იწვევს კარიესს, როგორ ვითარდება  და რა თანამედროვე მეთოდები არსებობს მის სამკურნალოდ ან პროფილაქტიკისთვის.

რა იწვევს კარიესს და როგორ ვითარდება ის?

კარიესი იწყება უმნიშვნელო დაზიანებით, რომელიც ხშირად უმტკივნეულოა და შეუმჩნევლად ვითარდება. დაავადების მთავარი მიზეზი ბაქტერიული ნადებია, რომელიც კბილის ზედაპირზე გროვდება. ამ ნადებში არსებული ბაქტერიები საკვების ნარჩენებს (განსაკუთრებით შაქარს) შლიან და გამოყოფენ მჟავას, რომელიც კბილის მინანქარს აზიანებს. თავდაპირველად ეს პროცესი მინანქრის მცირე დემინერალიზაციას იწვევს, რასაც თვალისთვის შეუმჩნეველი თეთრი ლაქები ახლავს. თუ ამ სიმპტომს თავიდანვე  ყურადღებას არ მივაქცევთ, კარიესი ღრმად შეაღწევს კბილის დენტინში, შემდეგ კი პულპაში, სადაც ნერვი და სისხლძარღვებია მოთავსებული. ამან კი შეიძლება გამოიწვიოს ძლიერი ტკივილი, ანთება და, საბოლოოდ, კბილის დაკარგვა.

კარიესის განვითარება ასევე დამოკიდებულია გენეტიკურ ფაქტორებზე, კვების ჩვევებზე და პირის ღრუს ჰიგიენაზე. კბილების რეგულარული და სწორი წმენდა აუცილებელია ბაქტერიული ნადების მოსაშორებლად. ასევე, განსაკუთრებული ყურადღება სჭირდება პირის ღრუს ძნელად მისადგომ უბნებს, მათ შორის სიბრძნის კბილის მიდამოს, სადაც ნადები ხშირად გროვდება და კარიესის განვითარებას უწყობს ხელს. ამ კბილების არასწორი ამოჭრა და განლაგება წმენდას ართულებს, ამიტომ მათი მდგომარეობის დროული კონტროლი აუცილებელია.

კარიესის პრევენცია და მკურნალობა

კარიესის პრევენცია შესაძლებელია, იგი  პირის ღრუს სწორი ჰიგიენით იწყება. კბილის რეგულარული გამოხეხვა, ძაფის გამოყენება და პირის ღრუს სავლები სითხეები ხელს უწყობს ბაქტერიული ნადების მოცილებას. ასევე, მნიშვნელოვანია რეგულარული ვიზიტი სტომატოლოგთან, რომელიც პროფესიონალურ წმენდას ჩაატარებს და პრობლემას ადრეულ ეტაპზე აღმოაჩენს.

რაც შეეხება მკურნალობას, იგი კარიესის ტიპზეა დამოკიდებული. საწყის ეტაპზე შეიძლება მკურნალობა ფტორიდების აპლიკაციით, რაც ხელს უწყობს მინანქრის აღდგენას. ღრმა დაზიანების შემთხვევაში საჭიროა დაზიანებული ქსოვილის მოშორება და კბილის დაბჟენა. თუ კარიესი უკვე პულპას მიუახლოვდა, აუცილებელია არხების მკურნალობა, ხოლო უკვე ძალიან დაზიანებული კბილისთვის შეიძლება გვირგვინის დადება გახდეს საჭირო.

დღესდღეობით სტომატოლოგია იყენებს თანამედროვე ტექნოლოგიებს, როგორიცაა ლაზერული მკურნალობა, რომელიც პროცედურას ნაკლებად მტკივნეულს ხდის. კარიესით გამოწვეული პრობლემების დროული დიაგნოსტირება და მკურნალობა უმნიშვნელოვანესია, რადგან გართულებები ხშირად უფრო რთულ და ძვირადღირებულ მკურნალობას საჭიროებს.

„ბლიც დენტალი – კახაბერ ხარებავას კლინიკა“ გთავაზობთ კარიესის დიაგნოსტიკას და მკურნალობას უახლესი გერმანული ტექნოლოგიებით, რაც ხელს უწყობს მკურნალობის უმაღლეს ხარისხს. ჩვენი გამოცდილი ექიმები დაგეხმარებიან აღიდგინოთ თქვენი ღიმილი და თავიდან აიცილოთ გართულებები.