როგორ აფასებს საზოგადოება მომსახურების ხარისხს საქართველოში – ACTR-ის ახალი კვლევის შედეგები

“ეისითი კვლევის” (ACTR) მიერ ჩატარებული კვლევის მიხედვით, საქართველოს მოსახლეობის მიერ მომსახურების ხარისხის შეფასების მაჩვენებელი გაიზარდა.

მოსახლეობამ მომსახურების ხარისხი საშუალოზე მაღალი ქულით შეაფასა: 10-ბალიანი სკალით 7.04 ქულა, რაც 2023  წელთან შედარებით გაზრდილია 0.4 ქულით (2023: 6.64 ქულა).  

კვლევის მიხედვით, სააფთიაქო მომსახურება 2025 წელსაც ინარჩუნებს ლიდერ პოზიციას (8.75 ქულა) და ეს მაჩვენებელი 2023 წელთან შედარებით გაუმჯობესებულია (8.59 ქულა).

მეორე და მესამე ადგილებს იკავებენ გასართობ-შემეცნებითი მომსახურებები (8.26 ქულა) და სილამაზისა და თავის მოვლის მომსახურებები (8.24 ქულა).

კვლევის ფარგლებში გამოვლინდა მომსახურების ის სფეროებიც, რომლებიც ვერ აკმაყოფილებს მომხმარებლის მოლოდინებს და ყველაზე დაბალი შეფასებები უფიქსირდება. საქართველოს მოსახლეობა 2025 წელს ყველაზე ნაკლებად კმაყოფილი არის ჯანდაცვის სფეროში მიღებული მომსახურებით: საავადმყოფოები, კლინიკები, ლაბორატორიები  (6.98 ქულა) და სადაზღვევო მომსახურება (7.23 ქულა).

ასევე, შედარებით დაბალი ქულებით ფასდება საზოგადოებრივი ტრანსპორტის მომსახურებით კმაყოფილება (7.62) და სუპერმარკეტებში, ჰიპერმარკეტებში, მინიმარკეტებში, მაღაზიებსა და მოლებში მიღებული მომსახურება (7.66).