ბათუმელები/ნეტგაზეთმა შემოსავლებს საგადასახადო შეთანხმებისთვის მიმართა

ბათუმელები/ნეტგაზეთის რედაქცია აცხადებს, რომ  შემოსავლებს საგადასახადო შეთანხმებისთვის მიმართა.

“შემოსავლების სამსახურის მიერ 22 ივლისს „ბათუმელების“ ანგარიშებზე ინკასოს დადების შესახებ გავრცელებული განცხადების თანახმად, „შემოსავლების სამსახური გამოთქვამს მზადყოფნას, რომ საგადასახადო შეთანხმების შემთხვევაში, მოუხსნას ყადაღა „ბათუმელების“ ანგარიშებს და შესაბამისი გრაფიკის მიხედვით, მისცეს საშუალება, რომ დაფაროს სახელმწიფო ბიუჯეტის წინაშე არსებული დავალიანება“.

განცხადების გავრცელების ამ ეტაპზე, ანუ 22 ივლისს „ბათუმელები/ნეტგაზეთის დავალიანება იყო 282 ათასი ლარი. მათ შორის ძირი თანხა იყო 47 ათასი ლარი, საურავი 126 ათასი ლარი და ჯარიმა – 109 ათასი ლარი.

„ბათუმელებმა“ მკითხველის დახმარებით ძირი თანხა – 47 ათასი ლარი უკვე გადაიხადა, ასევე დამატებით გადაიხადა სარეკლამო შემოსავლიდან მიღებული 12 ათასი ლარი. შესაბამისად, ამ ეტაპზე ძირი თანხის დავალიანება არის – 0 ლარი, ჯარიმა 95 ათასი ლარი და საურავი 126 ათასი ლარი.

საგადასახადო შეთანხმების შემთხვევაში, „ბათუმელები“ გამოთქვამს მზადყოფნას, 50 ათასი ლარი გადაიხადოს 30 დღის ვადაში.